Ermənistanın Baş naziri Nikol Paşinyan Estoniyaya rəsmi səfəri ilə Qərbin ona qarşı münasibətini yumşaltmağa çalışır ki, onun Moskvaya gözlənilən səfəri mümkün olsun. 

Missiya.Az xəbər verir ki, bu barədə “Hraparak” qəzeti yazı dərc edib.

Bildirilib ki, Qərb ona mayın 9-da Moskvada keçiriləcək Qələbə paradına getməsi ilə bağlı açıq şəkildə ultimatum verib və Paşinyana da bəyan edilib ki, Ermənistan-Rusiya münasibətlərinin istiləşməsi onlar üçün məqbul deyil.

Mənbənin sözlərinə görə, Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas həftələr əvvəl açıq şəkildə elan etdi ki, Aİ-yə namizəd ölkələr Moskva hərbi paradında iştirak etməməlidirlər. Latviyanın xarici işlər naziri Baiba Braje isə bu qadağanı pozanlara qarşı sanksiyaların tətbiq oluna biləcəyinə eyham vurmuşdu.

Qeyd edək ki, Ermənistan Aİ üzvlüyünə namizəd olmasa da, Ermənistan parlamenti “Ermənistanın Avropa İttifaqına üzvlüyü prosesinin başlanması haqqında” qanun layihəsini qəbul edib.

Daşqın Həsənov
Missiya.Az