Avropa ABŞ Prezidenti Donald Trampın təklif etdiyi, Rusiyanın Krım və bəzi işğal olunmuş ərazilər üzərində nəzarətinin tanınmasını nəzərdə tutan sülh planını qəbul etməyə hazırdır.

Missiya.Az xəbər verir ki, bu barədə “The Wall Street Journal” məlumat yayıb.

Bildirilib ki, Moskvanın Ukrayna ərazilərini ələ keçirməsini rəsmən tanımaq təklifi Kiyev və onun avropalı müttəfiqlərində narahatlıq yaradıb, lakin Avropa bu varianta da açıqdır.

"Böyük Britaniya və Fransa Ukraynanın təhlükəsizlik zəmanəti və iqtisadi dəstək müqabilində Rusiyanın ələ keçirdiyi ərazilərin bir hissəsinə nəzarəti itirməyə razılaşdığı ssenariyə açıqdır", - deyə vurğulanıb.

Qeyd olunub ki, Fransa və Böyük Britaniya Rusiyanın Ukraynadan ələ keçirdiyi ərazilərə nəzarəti yalnız de-fakto, Koreya müharibəsini bitirən ssenariyə bənzər şəkildə tanıyan sazişə üstünlük verəcəklər.

Xatırladaq ki, Ukrayna Prezidenti Volodimir Zelenski Trampın təklif etdiyi sülh planını rədd edib.

Daşqın Həsənov
Missiya.Az