“İran sülhün bərqərar olması, atəşkəsin qorunması və sülh sazişinin imzalanması üçün Ermənistan və Azərbaycanın təklif etdiyi istənilən formatı dəstəkləməyə hazırdır”.

Missiya.Az “NEWS.am”a istinadən xəbər verir ki, bunu İranın Ermənistandakı səfiri Mehdi Sübhani jurnalistlərə açıqlamasında deyib.

Onun sözlərinə görə, “3+3” yaxşı formatdır və onun köməyi ilə Ermənistanla Azərbaycan arasında sülh sazişinin imzalanmasına nail olmaq mümkündür. 

Sübhani bildirib ki, İran sərhəddə sülh və əmin-amanlığın bərqərar olmasının tərəfdarıdır və Tehran hesab edir ki, gərginliyin artmasına səbəb olacaq hər hansı hərəkətdən çəkinmək lazımdır.

İranlı diplomat əlavə edib ki, Ermənistan və Azərbaycan təmkin nümayiş etdirəcək və sülh sazişinin imzalanmasına davam edə biləcəklər.

"Biz ümid edirik ki, bütün tərəflər sülh və əmin-amanlığa yönəlmiş prinsiplərə sadiq qalacaqlar. Biz həm Ermənistan, həm də Azərbaycanla təmasdayıq. Təmaslarımız zamanı tərəfləri sülh sazişinin imzalanması istiqamətində irəliləməyə təşviq edirik", - deyə siyasətçi vurğulayıb.

Daşqın Həsənov
Missiya.Az