“İrəvan və Moskva arasında hərbi-texniki əməkdaşlıq məsələsi Ermənistan-Rusiya münasibətlərinin gündəmində qalır”.

Missiya.Az “Armenpress”ə istinadən xəbər verir ki, bu barədə Rusiyanın Ermənistandakı səfiri Sergey Kopırkin “24News” portalına müsahibəsi zamanı məlumat verib.

“Hərbi-texniki əməkdaşlıq mövzusu bizim münasibətlərimizin gündəliyindədir. Aydındır ki, mövcud vəziyyət proseslərə müəyyən təsir göstərir, lakin biz bu sahədə çox böyük işlər görmüşük”, - deyə diplomat vurğulayıb.

Səfir Ermənistanın təhlükəsizliyinin Qərb qüvvələrinin vədləri ilə deyil, 102-ci Rusiya hərbi bazasının və Rusiya sərhədçilərinin olması ilə təmin olunduğunu bildirib.

“Mən bildiyimə görə, heç kim İrəvana Rusiya-Ermənistan münasibətləri ilə müqayisə oluna biləcək təhlükəsizlik zəmanəti verməyib. Bu barədə mən bir dənə də olsun sənəd və bəyanat görməmişəm. Təhlükəsizlik sahəsində əməkdaşlığımızın əsas komponentləri olan hərbi-siyasi alyans öz yerində qalır. Rusiya bazası burada qalmaqda davam edir, sərhədçilərimizin mövcudluğu əsaslı şəkildə dəyişməyib və Ermənistan rəhbərliyi bunu kifayət qədər müsbət qiymətləndirir”, - deyə Kopırkin əlavə edib.

Daşqın Həsənov
Missiya.Az