Türkiyənin hazırladığı “Tayfun Block-4” hipersəs ballistik raketi İsraildə böyük səs-küyə səbəb olub.

Missiya.Az xəbər verir ki, israilli ekspert Hay Eytan Koen Yanurocak “Kanal 14”də müsahibəsində bildirib ki, Tel-Əviv də daxil olmaqla, bütün İsrail indi uçuş məsafəsi daxilindədir. 

“Bu raket sadəcə silah deyil, Türkiyənin yeni çəkindirmə səviyyəsinə çatdığına dair bir mesajdır. 7 oktyabr 2023-cü ildən sonra heç bir təhlükəni gözardı edə bilmərik", - deyə o vurğulayıb.

Yanurocak qeyd edib ki, Türkiyə boş oturmur, yeni ballistik raket təqdim edir və hazırda bu, çox da ürəkaçan mənzərə deyil.

Ekspert Türkiyənin təkcə raket texnologiyası ilə deyil, dəniz gücü ilə də bölgədə nüfuz sahibi olduğunu bəyan edib.

"Türkiyə ilə potensial münaqişə İranla müharibəyə bənzəməyəcək. Türkiyə regional superdövlətdir və onun nəhəng donanması, geniş əməliyyat varlığı və inkişaf etmiş müdafiə sənayesi var", - deyə Yanurocak əlavə edib.

Daşqın Həsənov
Missiya.Az