“Doğma kəndimin başının üstünü qara buludlar alıb. Tovuz rayon bazarının sahibinin puluna şirniklənən bəzi məmurlar Vahidli kəndinin bütün münbit torpaqlarını əlindən almağa qalxıblar”. 

Missiya.Az xəbər verir ki, bunu tanınmış jurnalist Dünya Sakit özünün sosial şəbəkə hesabında yazıb. O qeyd edib ki, yüz illər boyu Vahidli -Yekallar camaatına məxsus olan, 1930-cu illərdən bəri azı 10 dəfə dövlət sənədlərində rəsmiləşən torpaqlarda şəxsi biznesini qurmaq istəyən "bazarkom" 100-dək ailəni dolanışıq mənbəyindən məhrum etməyi planlaşdırır.

“Ona dəstək verən, yaxud problemə sükutla yanaşan məmurlar anlamırlar ki, əllərində silah erməniyə qarşı birlikdə vuruşmuş iki kəndi sözün həqiqi mənasında qardaş qırğınına sürükləyirlər. Vahidli sakinləri üzünü Azərbaycan dövlətinə, hüquq-mühafizə orqanlarına tutaraq, prosesin çox böyük münaqişəyə çevrilməsinin qarşısının vaxtında alınmasını xahiş edir. Bu kənd oğullarının qanı hesabına qoruduğu torpaqlarını heç kimin biznes maraqlarına qurban verməyəcək, bunu Tovuz rayon icra strukturları birmənalı olaraq nəzərə almalıdılar”,- deyə  jurnalist vurğulayıb.

Elcan
Missiya.Az