“Avropa İttifaqına (Aİ) üzvlük prosesinə başlamaq üçün layihəni təsdiqləmək Ermənistanın suveren hüququdur”.

Missiya.Az “Armenpress”ə istinadən xəbər verir ki, bunu Rusiya Xarici İşlər Nazirliyinin sözçüsü Mariya Zaxarova deyib.

O bildirib ki, Avropa İttifaqı və Avrasiya İqtisadi İttifaqı (Aİİ) çərçivəsində münasibətlər bir-birini istisna edir.

“Məsələ siyasi üstünlüklərdən deyil, Avropa İttifaqı və Aİİ daxilində münasibətlərin qurulduğu bütün tənzimləyici çərçivələrin və tarif sistemlərinin bir-birini istisna etməsindən gedir. Əlbəttə, söhbət Ermənistanın suveren seçimindən gedir, biz bunu heç bir şəkildə inkar etmirik, lakin həlledici məsuliyyət Ermənistanın hazırkı hökumətinin üzərinə düşür ki, onun planlaşdırdığı addımların bütün nəticələrini xalqa izah etsin”, - deyə siyasətçi vurğulayıb.

Zaxarova əlavə edib ki, bu halda ictimaiyyətə təkcə nəticələrin nüansları deyil, həm də mənzərəni tamamlamaq üçün digər dövlətlərin təcrübəsi izah edilməli və konkret misallar verilməlidir.

Qeyd edək ki, Ermənistan parlamenti birinci oxunuşda Avropa İttifaqına üzvlük prosesinin başlanması ilə bağlı qanun layihəsini qəbul edib. 

Daşqın Həsənov
Missiya.Az