Gürcüstanın baş naziri İrakli Kobaxidze oktyabrda ölkədə keçirilən parlament seçkilərindən sonra yenidən ölkənin baş naziri postuna namizəd kimi irəli sürülüb. 

Missiya.Az xəbər verir ki, bu barədə hakim “Gürcü arzusu” partiyasının icraçı katibi Mamuka Mdinaradze məlumat yayıb.

“Bildiyiniz kimi, bizim nizamnaməmizə görə, partiyanın fəxri sədri Bidzina İvanişvilinin baş nazir postuna namizəd irəli sürmək hüququ var. İvanişvilinin İrakli Kobaxidzeni baş nazir postuna namizəd kimi təqdim etməsi yəqin ki, o qədər də təəccüblü olmayacaq. Siyasi Şura bu qərarı tam dəstəklədi”, - deyə siyasətçi vurğulayıb.

Qeyd edək ki, oktyabrın 26-da keçirilən parlament seçkilərinin nəticələrinə görə, hakim “Gürcü arzusu” partiyası səslərin 53,93 faizini toplayaraq parlamentdəki 150 yerdən 89 mandat qazanaraq qalib gəlib. 

Daşqın Həsənov
Missiya.Az