Hər il ölkəmizdə noyabrın 6-sı radio və televiziya işçilərinin peşə bayramı günü kimi qeyd edilir.

Missiya.Az xatırladır ki, 1926-cı il noyabrın 6-da Azərbaycanda ilk dəfə radio verilişlərinin yayımına başlanılıb.

Bakı Televiziya Studiyası isə ilk dəfə 1956-cı il fevralın 14-də efirə çıxıb. İlk veriliş günündə ekranda Nəcibə Məlikova görünüb və çıxışına "Göstərir Bakı" kəlməsi ilə başlayıb. Həmin gün ekranda "Bəxtiyar" bədii filmi göstərilib.

Azərbaycan Televiziyası yaranandan sonra 6-noyabr təkcə radionun deyil, teleradionun yaranma günü kimi qeyd olunmağa başlayıb.

Azərbaycan müstəqillik əldə etdikdən sonra müstəqil teleradioşirkətlərin sayı da artıb.

Milyonlarla insan hər gün radio və televizorun köməyi ilə dünyanın müxtəlif yerlərində baş vermiş mühüm hadisələrdən xəbər tutur. Səs və görüntülər uzaq məsafələrə xüsusi cihazlar və peyk antenaları vasitəsilə ötürülür.

Hazırda ölkədə dövlət radio və televiziyası ilə yanaşı Space, Azad Azərbaycan, ARB kimi özəl televiziya və radio kanalları fəaliyyət göstərir.

Əziz həmkarlar, biz də sizi peşə bayramı münasibətilə təbrik edir, fəaliyyətinizdə uğurlar arzulayırıq.



Leyla SƏMƏNDƏR
Missiya.Az