“Ukrayna müharibəni uduzsa, sülh olmayacaq və Rusiya işğalını daha da gücləndirəcək. Ona görə də NATO Ukraynanı dəstəkləyəcək və ölkə üçün ədalətli sülh axtaracaq”.

Missiya.Az “Amerikanın Səsi”nə istinadən xəbər verir ki, bunu NATO-nun baş katibi Yens Stoltenberq deyib.

O, Çini Rusiyanın müharibədəki şəriki adlandırıb:

“Pekin Rusiya Federasiyasına hərbi-texniki yardım göstərir ki, bu da Kremlə bu müharibəni bu qədər uzun müddət davam etdirməyə imkan verir”, - deyə siyasətçi vurğulayıb.

Stoltenberq qeyd edib ki, NATO Pekinin bu cür rolunun qəbuledilməz olduğuna dair Çinə açıq siqnal göndərib.

“Çin Rusiya Federasiyasını birbaşa silah və hərbi texnika ilə təmin etməyə başlasa, bu, Qərbdə böyük narahatlıq yaradacaq. Bu halda Çinə qarşı sanksiyalar tətbiq oluna bilər ki, bu da başqa şeylərlə yanaşı, onun reputasiyasına xələl gətirəcək”, - deyə siyasətçi bildirib.

Daşqın Həsənov
Missiya.Az