Kütahya Azərbaycanlıları Kültür və Həmrəylik Dərnəyinin Xocalı ilə bağlı silsilə tədbirləri həyata keçirilib.

Missiya.Az xəbər verir ki, Kütahyanın Tuncbilək mahalının mərkəzində Xocalı soyqırımını əks etdirən pankartlarla yürüş edilib.

Tədbir Tuncbilək bələdiyyəsinin dəstəyi ilə Azərbaycan Parkında davam edib. Öncə Azərbaycan və Türkiyənin dövlət himnləri oxunub. Şəhidlərin ruhu 1 dəqiqəlik sükutla yad edilib. Sonra Tuncbilək bələdiyyə sədri Xocalıdan danışaraq bildirib ki, bu acıların bir də yaşanmaması üçün onun unudulmasına imkan verilməməlidir, daim xatırlanmalıdır. Dərnək prezidenti İlqar İdrisov da Xocalı ilə bağlı məlumatlarını bölüşüb. O bildirib ki, 32 il əvvəl bütün dünya Xocalı soyqırımı kimi bəşəriyyət əleyhinə və insanlığa qarşı törədilən bir cinayətin şahidi oldu. 1992-ci il fevral ayının 25-dən 26-na keçən gecə Ermənistan hərbi birləşmələri Xocalı şəhərində soyqırımı aktı törətməklə bütün dünyaya əsl xislətlərini göstərdilər.

Tədbir zamanı Xocalı soyqırımına aid soyqırıma aid rəsm sərgisi təşkil olunub. İştirakçılar, vətəndaşlar və xaricdən gələnlər sözügedən sərgini ziyarət ediblər.

Zərintac Mayisqızı
Missiya.Az