“Şagirdlərin məktəbə sensorlu mobil telefon (smartfon) aparması qadağan edilməlidir. Çünki sosial şəbəkələrə və porno saytlara giriş çox rahatdır”.

Missiya.Az xəbər verir ki, bu barədə AMEA Folklor İnstitutunun aparıcı elmi işçisi, Filologiya üzrə fəlsəfə doktoru, müstəqil ekspert, ictimai fəal Əpoş Vəliyev öz “facebook” hesabında Elm və Təhsil Nazirliyinə müraciət edib.

Onu sözlərinə görə şagirdlər təhsil ocaqlarında da istədikləri zaman həmin saytlara və sosial şəbəkələrə daxil ola bilir, zorakılıq videolarını kütləvi şəkildə izləyirlər:

“Bu da onların tərbiyəsinə və davranışına birbaşa təsir edir. Həm də bəzi şagirdlər sosial şəbəkələrdə paylaşıb reytinq yığmaq üçün istər dərs zamanı, istərsə də tənəffüslərdə xoşagəlməz çəkilişlər edir. Dərsdən sonra sensorlu mobil telefonun şagirdə verilib-verilməməsinə valideynlər özləri qərar verə bilər. Amma məktəblərə sensorlu mobil telefonun (smartfon) girişi birdəfəlik qadağan edilməlidir. Övladı üçün narahat olan valideynlər isə onlara sadə, yalnız zəng funksiyası olan telefon verə bilər”.

Zərintac Mayisqızı
Missiya.Az