Estoniya Xarici İşlər Nazirliyi çinli diplomatın Fransada keçmiş Sovet İttifaqının ölkələrinin suverenliyi ilə bağlı söylədiyi fikirlərə aydınlıq gətirmək üçün Çin səfirini çağıracaq.

Missiya.Az Report-a xəbər verir ki, bu barədə “Delfi”yə xarici işlər naziri Marqus Tsahkna bildirib.

XİN başçısının sözlərinə görə, çinli diplomatın bu cür bəyanatları təəssüf doğurur: “Çin Xalq Respublikası nümayəndəsinin belə fikirlər səsləndirməsi təəssüf doğurur. Belə mövqe anlaşılmazdır”.

Xatırladaq ki, ötən gün Çinin Fransadakı səfiri Lu Şae müsahibə verərək Sovet ölkələrinin suverenliyini şübhə altına alıb. O müsahibəsində deyib ki, keçmiş sovet ölkələrinin “beynəlxalq hüquqda effektiv statusu yoxdur”, çünki onların suveren ölkə statusunu reallaşdıracaq beynəlxalq müqavilə yoxdur. Həmçinin Krımı Ukraynaya aid hesab edib-etməməsi ilə bağlı sualı cavablandıran səfir “bu, problemi necə qəbul etməyinizdən asılıdır” deyib və əlavə edib ki, “bu o qədər də sadə deyil”.