İran təqvimi ilə 1401-ci ilin son günlərində, İranın ali dini rəhbəri Ayətullah Əli Xameneinin iştirakı ilə keçirilmiş müşavirənin məxfi stenoqramı yayılıb və rejimin köhnə ili hansı vəziyyətdə yola saldığı aşkara çıxıb. 

Missiya.Az xəbər verir ki, bu barədə “Azad İran” məlumat yayıb. İslam İnqilabının Keşikçiləri Korpusu – SEPAH-ın yüksək rütbəli zabitlərinin həmin müşavirədəki çıxışlarını özündə ehtiva edən 44 səhifəlik sənəd ölkənin vəziyyətinə bir növ içəridən baxışı və rejimin daxildən parçalanmasını əks etdirdiyi üçün beynəlxalq medianın diqqətini çəkib. 

Həmin sənədlə bağlı müxtəlif şərhlər yazılıb və təhlillər aparılıb. Sənədə əsasən həmin müşavirədə dəfələrlə vurğulanıb ki, son vaxtlar İranın hərbi və təhlükəsizlik strukturlarında məxfi məlumatların kənara ötürülməsi və satılması halları geniş yayılmaqdadır. 

Təsadüfi deyil ki, sənədi ilk dəfə dərc edən “Azadlıq zamanı” teleqram kanalının bildirdiyinə görə, Xameneinin ofisinin təhlükəsizlik xidməti bununla bağlı üç nəfəri istintaqa cəlb edib, digər analoji qurumlarda da məxfi sənədin kənara çıxması ilə əlaqədar araşdırmalar aparılır.

Leyla SƏMƏNDƏR

Missiya.Az