Şair, publisist Məstan Günər 1935-ci il iyulun 25-də Tovuz rayonunun Əsrik Cırdaxan kəndində anadan dünyaya gəlib. 

Missiya.Az xəbər verir ki, ilk şerləri "Sosializm kəndi" rayon qəzetində dərc olunub. 

Lakin respublika mətbuatına 1955-ci ildə "Ədəbiyyat və incəsənət" qəzetində çap etdirdiyi "İsti köynək", "Körpü" şerləri ilə çıxıb. Həmin vaxtdan ciddi bədii yaradıcılığa başlayıb. 

Publisistik və tənqidi məqalələrlə də çıxış edib. Onun ilk qələm təcrübələri, bir sıra lirik şerləri "Məstan Dəmirçioğlu", "Məstan Əsrikli", "Məstan Məsum" təxəllüsü ilə çap edilmişdir. İlk kitabları "Qartal", "Məsum Əliyev", "Məstan Əliyev", "Məstan" imzaları ilə çap olunub. Son üç kitabı isə "Məstan Günər" təxəllüsü ilə nəşr edilib. Əmək fəaliyyətinə jurnalist kimi başlayıb. Azərbaycan Dövlət Televiziya və Radio Verilişləri Komitəsində ədəbi işçi, redaktor, şöbə müdiri, baş redaktor, sonra "Ədəbiyyat və incəsənət" qəzeti redaksiyasında şöbə müdiri, "Gənclik" nəşriyyatında böyük redaktor, baş redaktor müavini vəzifələrində və s. çalışıb.