“Bakı və İrəvan arasında sülh müqaviləsi uzunmüddətli, davamlı həll yollarına əsaslanmalıdır”.

Missiya.Az “RİA Novosti”yə istinadən xəbər verir ki, bunu Rusiya xarici işlər nazirinin müavini Mixail Qaluzin deyib.

Siyasətçi bildirib ki, Bakı və İrəvan nəyin onların fundamental maraqlarına cavab verdiyini və xalqları üçün sabit və etibarlı sülhü necə təmin etmək niyyətində olduqlarını özləri qərar verirlər.

Onun sözlərinə görə, Rusiya Azərbaycan və Ermənistan arasında sülh prosesini hər cür dəstəkləyir:

31 oktyabr 2022-ci il tarixli Soçi sammitindən sonra liderlərin üçtərəfli bəyanatı regionda davamlı və uzunmüddətli sülhə nail olmaq üçün sülh müqaviləsinə fəal hazırlaşmağın vacibliyini vurğulayır. Bu birgə işə 2020-ci ilin noyabrından Rusiya, Azərbaycan və Ermənistan liderləri tərəfindən razılaşdırılmış üçtərəfli sazişlər toplusunun həyata keçirilməsi kontekstində baxılmalıdır. Onlar Ermənistan-Azərbaycan münasibətlərinin normallaşması prosesinin əsasını təşkil edir və Bakı ilə İrəvanın barışması üçün yol xəritəsini formalaşdırır. Bura nəqliyyat və iqtisadi əlaqələrin blokunun açılması, Ermənistan-Azərbaycan sərhədinin delimitasiyası və vətəndaş cəmiyyəti vasitəsilə təmasların inkişafı istiqamətində addımlar daxildir", - deyə Qaluzin vurğulayıb.

Sülh müqaviləsinin mövzusuna qayıdaraq Qaluzin qeyd edib ki, Rusiya tərəfi ümumi dil tapmağa, onlara uyğun gələn razılaşmalara və güzəştlərə getməyə kömək edir.

 

Daşqın Həsənov
Missiya.Az