Dövrümüzün geniş yayılmış problemlərindən biri də yuxusuzluqdur. Bu ya yatmaqda çətinlik çəkmək, ya da tez oyanıb yenidən yuxuya gedə bilməmək şəklində özünü büruzə verir. Sözügedən problemdən əziyyət çəkən insanlarda isə gün ərzində bitkinlik, halsızlıq və ruh düşkünlüyü də müşahidə edilir.

Görəsən yuxusuzluq nədən yaranır? Onu necə aradan qaldırmaq olar?

Həkim – terapevt Günay Musayeva Missiya.Az-a açıqlamasında deyib ki, əsas səbəblərin başında stress, narahatlıq, depressiya, qeyri-düzgün yuxu rejimi, kafein və nikotin istifadəsi, habelə bəzi xəstəliklər durur: 

“Bundan əlavə texnologiyanın həddindən artıq istifadəsi, yatmazdan əvvəl kompüter və telefon ekranına baxmaq yuxu rejiminə mənfi təsir göstərir. Uzun müddətli yuxusuzluq ciddi sağlamlıq problemlərinə yol açdığı kimi, ilk növbədə beyin funksiyalarını zəiflədir. Diqqət və yaddaş problemləri ortaya çıxır, immunitet sistemi aşağı düşür və insanlar daha tez-tez xəstələnir. Yatmaqda çətinlik çəkmək ürək-qan damar xəstəlikləri, yüksək qan təzyiqi, şəkərli diabet və piylənmə riskini artırır. Psixoloji məqamlar da var. Bəzi şəxslər daha əsəbi olur, depressiyaya düşür”.

Həkimin sözlərinə görə, yuxu rejimini qaydaya salmaq üçün bir neçə vacib nüansa diqqət yetirmək önəmlidir:

“Bunlardan birincisi sabit yuxu rejimidir, hər gün eyni saatda yatmaq və oyanmaq gərəklidir. Otağınız sakit və qaranlıq olmalıdır. Telefon, planşet və kompüter kimi vasitələrə ən azı yatmazdan 1 saat əvvəl baxmayın. Axşam saatlarında çay, qəhvə və siqaretdən istifadə etməyin. Kitab oxumaq, isti duş qəbul və meditasiya etmək rahat yatmağa şərait yaradır. Gündəlik idman faydalı olsa da yuxudan öncə məşğul olmayın. Problem uzun müddət davam edirsə həkimə müraciət olunmalıdır”.

Zərintac Mayisqızı
Missiya.Az