Ötən il İnformasiya və Kommunikasiya Texnologiyaları Agentliyinin (İKTA) “E-Şikayət” platformasına 3 745 müraciət daxil olub.

Missiya.Az xəbər verir ki, bu barədə İnformasiya Kommunikasiya Texnologiyaları Agentliyinin (İKTA) ötən ilin yekunlarına dair hesabatında qeyd olunub.

Məlumata görə, bu, gün ərzində orta hesabla 10 müraciət deməkdir. Həmin müraciətlərdən 3526-sı (94,15%) telekommunikasiya, 219-u (5,85%) isə poçt rabitəsi sahəsi ilə bağlı olub.

İnternet xidməti ilə bağlı əsasən, xidmətin keyfiyyəti, xidmətin işləməməsi, əməkdaşlardan və ya xidmətdən narazılıq, tariflərlə bağlı şikayətlər olub. Mobil rabitə sahəsində ən çox operator dəyişdirmə, tariflərlə bağlı şikayət, operator və provayderin ümumi fəaliyyətindən narazılıq, xidmətin keyfiyyəti ilə bağlı şikayət, infrastrukturla əlaqədar şikayətlər daxil olub. Telefon rabitəsi üzrə əsas şikayətlər xidmətin işləməməsi, əməkdaşlardan və ya xidmətdən narazılıq, infrastrukturla əlaqədar, xidmətin qoşulması və xitamla bağlı şikayətlər olub. Mobil internet sahəsində isə ən çox operator dəyişdirmə, operator və provayderin ümumi fəaliyyətindən narazılıq, tariflərlə bağlı, xidmətin işləməməsi ilə bağlı, ödənişlər və korreksiya ilə bağlı şikayətlər edilib.