Ukraynanın Vaşinqtondakı müttəfiqləri Prezident Volodimir Zelenskini faydalı qazıntılar üzrə saziş imzalamağa məcbur edirlər. Onların fikrincə, Ukrayna lideri ABŞ Prezidenti Donald Trampla münasibətlərini bu cür yolla düzəldə bilər.

Missiya.Az “Politico”ya istinadən xəbər verir ki, bu barədə Ağ Evdəki mənbələr məlumat yayıb.

Qeyd olunub ki, Trampın Zelenskini tənqid etməsi Rusiyaya dönüş deyil, Amerika administrasiyasının Ukraynanın mineral ehtiyatlar üzrə sazişi imzalamaq istəməməsinə reaksiyasıdır.

Nəşr Trampın Zelenskini tənqid etməsinin Kiyevdə qəzəb doğurduğunu vurğulayıb. 

Bundan başqa, jurnalistlər xatırladıblar ki, Ukraynanın mineral ehtiyatları müqabilində Ukraynaya heç bir konkret təhlükəsizlik zəmanəti təklif olunmayıb.

Mənbələr jurnalistlərə bildiriblər ki, Trampın Zelenski ilə bağlı açıqlamaları çox ciddi qəbul edilməməlidir. Onlar hesab edirlər ki, bu, mümkün olan ən yaxşı sövdələşməyə nail olmaq istəyən ABŞ Prezidentinin danışıqlar taktikasının bir hissəsidir.

Mənbələr əlavə edib ki, sövdələşmə Ukraynanın Ukraynanın faydalı qazıntı yataqlarının 50 faizinin Amerika şirkətlərinə verilməsini nəzərdə tutur. Onlar strateji əhəmiyyətə malikdir və potensial olaraq yüz milyardlarla dollar dəyərində ola bilər.

Daşqın Həsənov
Missiya.Az