Bu ay Almaniya kansleri Olaf Şolts Rusiya prezidenti Vladimir Putinlə telefon danışığının təfərrüatlarını açıqlayıb.

Missiya.Az xəbər verir ki, almaniyalı siyasətçi bu barədə “ZDF” telekanalına müsahibəsi zamanı məlumat verib.

Kansler Putinlə telefon danışığının heç də xoş olmadığını bildirib.

Şolts qeyd edib ki, o, Kreml rəhbəri ilə 2022-ci ilin sonuna qədər bir neçə dəfə telefonla danışıb və bu söhbətlərin heç biri asan və ya xoş olmayıb. 

Onun sözlərinə görə, bu dəfə də vəziyyət dəyişməyib, lakin siyasətçi belə dialoqların davam etdirilməsini vacib hesab edib.

O, əlavə edib ki, bir telefon zəngi ilə sülhün tezliklə bərqərar olacağına ümid edənlər var. Lakin o, bu cür gözləntiləri illüziya adlandırıb və Putinin mövqeyini dəyişmədiyini və bundan bir addım belə uzaqlaşmadığını vurğulayıb.

"Bütün arqumentlər əslində yenə təkrarlandı. Və mənə aydın idi ki, mən də özümü təkrarlamalıyam. Yəni, Putin, bizdən dəstəyi azaltmağı gözləmə. Sən bu müharibədən çıxış yolu tapmalısan. Hücumlarınızı dayandırmalı və qoşunlarınızı geri çəkməlisiniz", - deyə siyasətçi yekunlaşdırıb.

Daşqın Həsənov
Missiya.Az