İyulun 25-də Hindistanın Racastan ştatının Piplodi kəndində məktəbin damı uçub.

Missiya.Az "NDTV" telekanalına istinadən xəbər verir ki, qəza nəticəsində ölənlərin sayı 7 nəfərə çatıb, 27 nəfər yaralanıb.

Bildirilib ki, dağıntılar altında qalan bütün uşaqlar xilas edilib. 

"Bina uçan kimi kənddə xaos yaranıb. Yerli sakinlər, müəllimlər və rəhbərliyin köməkliyi ilə xilasetmə əməliyyatına başlanılıb", - telekanal əlavə edib.

Təhsil naziri Madan Dilavar zərər çəkmiş azyaşlılara və ailələrə hər cür yardım göstəriləcəyini bildirib. O, həmçinin hadisənin ən yüksək səviyyədə araşdırılacağını və təqsirli olan şəxslərə qarşı “ciddi tədbir görüləcəyini” açıqlayıb. 

“Belə səhlənkarlığa yol verilməyəcək”, - nazir vurğulayıb.

Hadisə zamanı məktəbdə təxminən 60-70 uşağın olduğu dəqiqləşdirilib. Bundan əlavə, dağıntılar altından çıxarılan iki uşağın vəziyyəti ağırdır.