Ukraynanın cənubundakı quraq rayonların enerji təchizatı, suvarma və su təchizatı, həmçinin Xersondan Zaporojyeyə naviqasiya üçün Dnepr axınının illik tənzimlənməsini təmin edən Kaxovka su elektrik stansiyasının bəndi məhv edilib. 

Missiya.Az Ukrayna mediasına istinadən xəbər verir ki, Xerson vilayətinin Rusiya Silahlı Qüvvələrinin nəzarət etdiyi hissəsində yerləşən su elektrik stansiyasının kim tərəfindən vurulduğu və ya partladıldığı dəqiq bəlli deyil. 

Faktla bağlı Ukraynanın "Cənub" operativ komandanlığı Rusiyanın su elektrik stansiyasını partlatdığını açıqlayıb. 

İnsidentdə Rusiya və Ukrayna bir-birini ittiham edir. Ukrayna Prezidenti Volodimir Zelenski Kaxovka su elektrik stansiyasının bəndinin partladılmasına görə Milli Təhlükəsizlik və Müdafiə Şurasının iclasını çağırıb. 

Qeyd edək ki, Kaxovka su elektrik stansiyası 2022-ci ilin fevralında Şimali Krım kanalı ilə birlikdə işğal olunub.

Leyla SƏMƏNDƏR

Missiya.Az