“Rusiya hazırda Cənubi Qafqaza hərbi müdaxilə etmək və ayrı-ayrı ölkələrə təzyiq göstərmək üçün çox zəifdir. Kreml başa düşəcək ki, danışıqlar qarşıdurmadan yaxşıdır”.

Missiya.Az xəbər verir ki, bu sözləri Polşa Beynəlxalq Münasibətlər İnstitutunun Cənubi Qafqaz üzrə analitiki Voyçex Voytaşeviç deyib.

O bildirib ki, Azərbaycan hakimiyyəti hazırda çoxvektorlu xarici siyasət yürütməkdə maraqlıdır. Bu, Azərbaycanın müstəqilliyini və əzmkarlığını göstərir.

“Azərbaycan həm Qarabağdakı qələbədən sonra, həm də Türkiyə və İsrailin güclü hərbi dəstəyi sayəsində belə bir mövqe qazana bilər. Ona görə də Bakıya güclü təzyiqlər səmərəsizdir”, - deyə analitik əlavə edib.

Onun sözlərinə görə, Moskva hərbi təzyiq göstərməkdə zəifdir, ona görə də sonradan danışıqlara keçə bilər.

"Ukraynadakı münaqişə ucbatından Rusiya hazırda ayrı-ayrı ölkələrə təzyiq göstərmək üçün Cənubi Qafqaz regionuna hərbi müdaxilə edə bilməyəcək qədər zəifdir. Gec-tez Kreml dərk edəcək ki, Azərbaycan Prezidenti İlham Əliyevlə pərdəarxası danışıqlar açıq qarşıdurmadan daha yaxşı nəticə verəcək", -  deyə Voytaseviç qeyd edib.

Daşqın Həsənov
Missiya.Az