“Rusiya Ermənistanla Azərbaycan arasında münasibətlərin normallaşmasına fəal dəstək verməkdə davam edir”.

Missiya.Az “Hraparak” nəşrinə istinadən xəbər verir ki, bunu Rusiyanın xarici işlər naziri Sergey Lavrov İrəvanda ermənistanlı həmkarı Ararat Mirzoyanla geniş tərkibdə görüşü zamanı deyib.

O bildirib ki, Moskva sülhün bərqərar olmasında və ikitərəfli münasibətlərin tam normallaşdırılmasında səmimi maraqlıdır. 

Onun sözlərinə görə, bu prosesin möhkəm təməli 2020 və 2022-ci illərdə Rusiya və Azərbaycan Prezidentləri ilə Ermənistanın Baş naziri arasında imzalanmış üçtərəfli sazişlərdir.

"Biz Ermənistan və Azərbaycan arasında sülh müqaviləsinin mətni üzrə razılaşmanı alqışlayırıq və sənədin yekun imzalanması üçün qalan məsələlərin həllini dəstəkləməyə hazırıq", - deyə Lavrov vurğulayıb.

O qeyd edib ki, İrəvan həm nəqliyyat və iqtisadi marşrutların açılmasında, həm də sərhəd və humanitar məsələlərin həllində Moskvanın dəstəyinə tam arxalana bilər.

Rusiya XİN rəhbəri həmçinin əlavə edib ki, Moskva 3+3 regional əməkdaşlıq formatına önəm verir və onun potensialına inanır. 

Daşqın Həsənov
Missiya.Az