ABŞ-nin cənub ştatlarında güclü tufan və daşqınlar nəticəsində ölənlərin sayı 20 nəfərə çatıb.

Missiya.Az xəbər verir ki, "ABC News" bu barədə aprelin 7-də qubernatorlara və digər hökumət rəsmilərinə istinadən məlumat yayıb.

“Çərşənbə günündən bəri kəskin hava şəraiti nəticəsində azı 20 nəfər ölüb, o cümlədən Kentukki ştatında avtobus dayanacağına gedərkən sel suları tərəfindən aparılmış 9 yaşlı uşaq da var”, - nəşr yazıb. Güclü yağış və qasırğadan zərər çəkmiş yaşayış məntəqələrində xilasetmə qrupları işlərini davam etdirir. Qeyd olunub ki, hazırda altı ştatda ölümlər var: Tennessi, Missuri, Kentukki, İndiana, Arkanzas və Missisipi. Bir neçə ştatda infrastruktur zədələnib: yollar su altında qalıb, ağaclar və elektrik xətləri uçub. Son bir həftə ərzində 90-dan çox tornado hadisəsi qeydə alınıb.

Xatırladaq ki, “Washington Post” aprelin 6-da fırtına nəticəsində ölənlərin sayının 15-ə çatdığını bildirib. Qurbanların əksəriyyətinin Tennessi ştatının qərbindən olduğu vurğulanıb.

Zərintac Mayisqızı
Missiya.Az