“ABŞ Rusiyanın Ukraynadakı müharibəni dayandırmağa hazır olub-olmadığını aylar yox, həftələr sonra biləcək”.

Missiya.Az xəbər verir ki, bunu ABŞ dövlət katibi Marko Rubio Brüsseldə NATO xarici işlər nazirləri ilə görüşündən sonra mətbuat konfransı zamanı deyib.

"ABŞ Prezidenti Donald Trampın etmək istədiyi budur. Əgər Rusiya və Ukrayna razılaşarsa, bu müharibəni hər iki tərəf üçün məqbul şərtlərlə bitirmək olar. Biz indi o şərtləri tapmaq prosesindəyik və Rusiyanın sülhə hazır olub-olmadığını aylar yox, həftələr ərzində biləcəyik", - deyə siyasətçi vurğulayıb.

Onun sözlərinə görə, Vaşinqton indi Rusiyanın sülhə hazır olub-olmadığını araşdırır. 

"Biz indi rusların sözlərinə deyil, hərəkətlərinə baxırıq", - deyə Rubio əlavə edib.

O, xəbərdarlıq edib ki, Rusiya sülh prosesini gecikdirərsə, ABŞ Prezidenti Donald Tramp Moskva ilə danışıqları dayandıracaq.

Rubio həmçinin qeyd edib ki, ukraynalılar artıq atəşkəs və danışıqlar üçün məkanın yaradılmasına hazır olduqlarını nümayiş etdiriblər.

Daşqın Həsənov
Missiya.Az