3 aprel məşhur Türk pop müğənnisi və bəstəkarı Kayahan Açarın anım günüdür.
Missiya.Az xəbər verir ki, o, 29 mart 1949-cu ildə İzmirdə anadan olub.
Uşaqlıq və gənclik illərini Ankarada keçirən müğənni daha sonra İstanbula köçüb. İstanbuldan sonra uzun müddət Balıkesir-Göməçdəki İnta Sevgi kəndində Gecələr Prospekti və Mavilim Küçəsində yaşayıb. Həmin kənddəki bütün prospekt və küçələr Kayahanın mahnılarının adlarından ibarətdir.
Sənətkar ilk olaraq tanınmış müğənni Nilufərə verdiyi gözəl mahnılarla adını eşitdirməyə başladı. Nilufərin ifa etdiyi "Geceler", "Kar Taneleri", "Esmer Günler" mahnıları çox sevilib.
İfaçı hazırladığı bütün albomları bir şüarla tanıdırdı. 3 iyun 1991-ci ildə çıxardığı "Yemin Ettim" adlı albomu ilə satış rekordu qıran Kayahan "Yolu sevgidən keçən hər kəslə bir gün bir yerdə görüşərik" şüarı ilə tanınıb.
Uşaqlar üçün də mahnılar yazan Kayahan televiziyada uşaq proqramı da hazırlayıb. 30 aprel 1992-ci ildə isə "Odalarda Işıksızım" albomunu çıxarıb. 1993-cü ilin martında Raks Musiqi etiketli "Son Şarkılarım" adını verdiyi albomunda yenə özünə aid olan on mahnı yer alıb. "Sarı Şekerim", "Vazgeçmem", "Aman", "Kardeşiz Senle" kimi mahnıların önə çıxdığı albom da böyük satış əldə edib və s.
Pop-müğənninin "Bir Aşk Hikayesi" musiqisi də çox sevilir.
İlk dəfə 1990-cı ildə ağciyər xərçənginə tutulan müğənni 2005-ci ildə ikinci dəfə bu xəstəliklə qarşılaşıb. Həmin müddətdə 4 dəfə əməliyyat olunan və radioterapiya keçəndən sonra yenidən ayağa qalxa bilib. İlk dəfə xərçəngə tutulan zaman "Yemin etdim"i yazan müğənni uzun illər sonra deyib: "Yaşanacaq günümüz var imiş. Ölüm cəza deyil, mən elə düşünürəm. Müalicə olundum, dediklərinə görə 6 ay ömrüm qalmışdı. Onların dedikləri vaxtdan 21 il keçdi".
2014-cü ildə isə 3-cü dəfə narahatlığı artan Kayahan yenidən xəstəlikdən müalicə olunurdu. Martın 23-dən xəstəxanaya yatan ifaçının müalicəsi martın 25-dən reanimasiyada davam etdirilib.
Aprelin 3-ü dünyadan köçüb, mərhumun cənazəsi Teşvikiye məscidində qaldırılaraq öz vəsiyyəti ilə Kanlıca Mihrimah Sultan Qəbiristanlığında dəfn olunub.
Zərintac Mayisqızı
Missiya.Az
