ABŞ Prezidentinin xüsusi nümayəndəsi Keyt Kelloq Rusiya-Ukrayna müharibəsinin həlli üzrə danışıqlar prosesindən faktiki olaraq uzaqlaşdırılıb. O, Səudiyyə Ərəbistanında ABŞ-Ukrayna danışıqlarında iştirak etməyib.

Missiya.Az xəbər verir ki, bu barədə “Politico” məlumat yayıb.

Bildirilib ki, ABŞ Prezidenti Donald Tramp administrasiyasının nümayəndələri Kelloqun faktiki olaraq danışıqlardan kənarlaşdırıldığını iddia edirlər.

Məlumata görə, ukraynalılar və ruslarla danışıqlarda əsas rolu hazırda ABŞ dövlət katibi Marko Rubio, milli təhlükəsizlik müşaviri Mayk Volz və Yaxın Şərq üzrə xüsusi nümayəndə Stiv Vitkoff oynayır.

Ağ Ev isə bu ittihamları rədd edir. Milli Təhlükəsizlik Şurasının nümayəndəsi Ceyms Hewitt bəyan edib ki, Kelloq xüsusilə Avropa müttəfiqləri ilə danışıqlarda əsas fiqur olaraq qalır.

Xatırladaq ki, ötən gün Səudiyyə Ərəbistanında ABŞ və Ukrayna nümayəndə heyətləri arasında danışıqlar aparılıb və bu danışıqlar zamanı Kiyev 30 günlük tam atəşkəsə hazır olduğunu bəyan edib. 

Daşqın Həsənov
Missiya.Az