Türkiyənin məşhur müğənnisi Özcan Dəniz Bakıya gəlib. 

Missiya.Az xəbər verir ki, sənətçi Bakı Konqres Mərkəzində konsert proqramı ilə çıxış edib. 

İfaçı konsertində bildirib: “Səhnə çox əcaib yerdi, 40 dərəcə hərarətlə səhnəyə çıxdığım günlər yadımdadır”. 

O, səhhəti ilə bağlı yayılan xəbərlərə də münasibət bildirib: “Səhnə həkimlərin sağaltmadığını sağaldır. Ürək infarktı keçirməmişəm, ürək spazması var. Çox yaxşıyam. Bakıya gəlməyi uzun zamandır gözləyirdik. Ürəyim bir yana, böyrəyimi də istəsəydilər, verərdim, bura gələrdim, yenə bu mahnıları oxuyardım”. 

Konsert boyunca ən sevilən köhnə və yeni hit mahnıları səsləndirən müğənninin konserti anşlaqla keçib. Özcan Dənizi izləmək üçün 4000-ə yaxın tamaşaçı bir araya gəlib. 

Sevənləri bütün ifaları müğənni ilə birlikdə əzbərə söyləyiblər. Konsert boyunca tamaşaçıları ilə səmimi dialoqlara girən sənətçi müjdəni də verib. Belə ki, ifaçı 31 oktyabrda yenidən Bakıya gələcək. 

Qeyd edək ki, konserti təşkil edən Eyyub Hüseynzadənin təsis etdiyi “Anadolu Events” şirkətidir.