ABŞ Prezidenti Donald Tramp ölkəsinin Qəzza zolağına nəzarəti ələ keçirməyə və anklavı inkişaf etdirməyə hazır olduğunu bildirib. O, həmçinin regiona Amerika qoşunlarının yerləşdirilməsi imkanını da istisna etməyib.

Missiya.Az “Reuters”ə istinadən xəbər verir ki, bu barədə Ağ Ev rəhbəri Vaşinqtonda İsrailin Baş naziri Benyamin Netanyahu ilə keçirdiyi mətbuat konfransı zamanı məlumat verib.

"Birləşmiş Ştatlar Qəzza zolağına nəzarəti ələ keçirəcək və biz bununla da işləri görəcəyik. Biz onu idarə edəcəyik və bütün təhlükəli bombaların və partlamamış digər silahların sökülməsinə cavabdeh olacağıq", - deyə Tramp bildirib.

ABŞ hərbçilərinin Qəzzaya daxil olması ehtimalı ilə bağlı media nümayəndələrinin suallarını cavablandıran Amerika lideri qeyd edib ki, lazım gələrsə, bunu edəcəyik.

"Biz bu ərazini götürəcəyik. Biz onu inkişaf etdirəcəyik, o cümlədən minlərlə iş yeri yaradacağıq və bu, bütün Yaxın Şərqin fəxr edə biləcəyi bir şey olacaq", - deyə siyasətçi əlavə edib.

Daşqın Həsənov
Missiya.Az