Çeçenistanın paytaxtı Qroznı şəhərində dekabrın 25-də səhər saatlarında silsilə partlayışlar baş verib. Yerli sakinlər Ukraynanın pilotsuz təyyarəsinin hücumunu videoya çəkib. 

Missiya.Az Çeçenistandan idarə olunan Telegram kanallarına istinadən xəbər verir ki, Qroznıda azı dörd-beş partlayış baş verib, bir neçə pilotsuz təyyarə Daxili İşlər Nazirliyinin Axmat Kadırov adına 2-ci xüsusi alayının bazası ərazisinə düşüb. 

Çeçenistan Təhlükəsizlik Şurasının katibi və Çeçenistan lideri Ramzan Kadırovun qardaşı oğlu Həmzət Kadırov bu bölmənin komandiri Zamid Çalayevə istinadən bütün pilotsuz təyyarələrin vurulduğunu iddia edib. Bundan əlavə, yerli Teleqram kanallarının məlumatına görə, dronlar qonşu İnquşetiya bölgəsinə də hücum ediblər. Bir PUA Malqobek şəhərinə düşüb.

Məlumatda o da qeyd olunur ki, dronların vurulduğu zaman Azərbaycana məxsus sərnişin təyyarəsi Qroznı hava məkanında olub və yerdən PUA-ları hədəfləyən raket zərbələri səbəbindən hava limanına eniş edə bilməyib. 

Elcan
Missiya.Az