Ötən gün Bakıya gələn dünyaca məşhur futbolçu Lionel Messi paytaxtın gəzməli və görməli yerlərində oldu, məşhur restoranlara qonaq aparıldı.Ən əsası isə Bakı Kristal Zalında onun fanatları izdihamlı görüşü təşkil olundu. Lakin çox təəssüf ki, argentinalı ulduz Bakıya səfəri barədə özünün sosial media hesablarında heç bir paylaşım etmədi. 

Missiya.Az xəbər verir ki, Messiyə kifayət qədər isti münasibət göstərilməsinə baxmayaraq, onun ölkəmizə qarşı laqeyid münasibəti insanlar arasında birmənalı qarşılanmayıb və müzakirələrə səbəb olub. 

Yaxşı olardı ki, bu cür dünya ulduzu ən azı Azərbaycanla bağlı bir fotosunu paylaşaraq, ölkəmizlə bağlı xoş sözlərini qısa cümlə ilə də olsun tamamlayardı. 

Təəssüflər olsun ki, Messinin bu biganəliyi, faktiki olaraq Bakıya gəlməyibmiş kimi davranışı onun ölkəmizdəki fanatlarının da üzüntüsünə səbəb olub. 

Argentinalı ulduzla yanaşı, onun komanda yoldaşları Luis Suarez, Jordi Alba və Serxio Buskets də ölkəmizlə bağlı özlərinin sosial şəbəkə hesablarında heç bir paylaşım etmədilər.

Daşqın Həsənov
Missiya.Az