Avropa Parlamenti Gürcüstanın hökumət rəhbərlərinə sanksiya tətbiq edilməsi ilə bağlı qətnamə qəbul edib.

Missiya.Az xəbər verir ki, sözügedən məsələ ilə bağlı qətnamə 444 səslə qəbul edilib, 72 deputat isə sənədin əleyhinə səs verib.

Bildirilir ki, qətnamədə Gürcüstanda yeni və azad seçkilərin keçirilməsi, həmçinin hakim "Gürcü arzusu" partiyasının fəxri sədri Bidzina İvanişvili, baş nazir İrakli Kobaxidze, Tbilisi meri Kaxa Kaladze, parlamentin sədri Şalva Papuaşvili, “Gürcü Arzusu” partiyasının sədri İrakli Qaribaşvili və siyasi motivli hökmlər çıxaran hakimlərə qarşı şəxsi sanksiyaların tətbiqi tələb edilir.

Qətnamədə Gürcüstanla sadələşdirilmiş viza rejiminin yenidən nəzərdən keçirilməsi, həmçinin Gürcüstan hökuməti və parlamenti ilə rəsmi səviyyədə əlaqələrin məhdudlaşdırılması çağırışı edilib. 

Məlumata görə, qətnamədə Gürcüstanın sabiq prezidenti Mixeil Saakaşvilinin humanitar əsaslarla dərhal azad edilməsi çağırışı bir daha təkrarlanıb.

Qeyd olunub ki, avropalı parlamentarilər Gürcüstanda keçirilən parlament seçkilərindən sonra Macarıstanın Baş naziri Viktor Orbanın Tbilisiyə səfərini də pisləyiblər.

Daşqın Həsənov
Missiya.Az