Nikol Paşinyanı “satqın” və “yarımçıq” adlandıran 21 yaşlı David Avetisyana Ermənistan Cinayət Məcəlləsinin 297-ci maddəsi ilə (xuliqanlıq) cinayət işi açılıb.

Missiya.Az xəbər verir ki, bu barədə sonuncunun vəkili Arayik Papikyan News-NEWS.am müxbirinə müsahibəsində bildirib. Onun sözlərinə görə, David Paşinyanla iyulun 2-də İngilis bağında görüşüb. 

“David Paşinyana deyib: sən mənim həlak olan bütün dostlarım və digər qəhrəmanlarım üçün cavab verəcəksən. Onu “satqın” və “yarımçıq” adlandırıb. Gənc Paşinyana kifayət qədər yaxın olub, hətta ona toxunub. Bir neçə saniyə sonra Dövlət Təhlükəsizliyi Xidmətinin mülki geyimli əməkdaşları ona yaxınlaşıb və Paşinyanın iştirakı ilə Davidi yerə yıxıblar" 

İbtidai istintaq orqanında “satqın” və “yarımçıq” sözləri təhqir kimi qiymətləndirilib və vəkilin fikrincə, bu, əsassızdır. Yeganə faktiki əsas polis əməkdaşının verdiyi ifadədir. Müdafiə tərəfi Paşinyanın bu işdə zərərçəkmiş kimi tanınıb-tanınmadığını bilmir. “Bu, sadəcə olaraq insana təzyiq formasıdır”, - Papikyan belə deyib.