Bu gün Nizami rayonunda şəhid Vüqar Cəfərovun doğum günü ilə əlaqədar anım mərasimi keçirilib.

Əvvəlcə Nizami rayon İcra Hakimiyyətinin başçısı Coşqun Cəbrayılovun da iştirakı ilə şəhidin məzarı ziyarət olunub. Daha sonra mərasim Vüqar Cəfərovun yaşadığı binanın həyətində YAP Nizami Rayon Təşkilatının və Missiya Media Qrupunun  birgə dəstəyi ilə yaradılmış xatirə guşəsi ətrafında davam etdirilib. 

Azərbaycanın Daxili İşlər Nazirliyinin Daxili Qoşunlarının baş çavuşu olan Vüqar Cəfərov Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib və oktyabrın 5-də Cəbrayıl uğrunda döyüşlər zamanı şəhid olub.

Vüqar Cəfərov Prezident İlham Əliyevin sərəncamı ilə "Vətən uğrunda", "Kəlbəcərin azad olunmasına görə" və "Cəbrayılın azad olunmasına görə" medalları ilə təltif olunub.

Missiya Media Qrupu olaraq Vüqar Cəfərovun valideynlərini daim diqqətdə saxlayırıq. Missiya Media Qrupunun dəstəyi ilə Vüqar Cəfərovun yaşadığı mənzilin bir otağında onun xütirəsini əbədiləşdirmək məqsədilə kiçik muzey də yaradılıb. Bundan başqa, binanın həyətində geniş abadlaşdırma işləri də aparılıb.