“Dünyanın Rusiya taxılına və gübrələrinə ehtiyacı var, ona görə də bütün ölkələr ərzaq sazişini həyata keçirmək üçün birlikdə çalışmalıdırlar”. 

Missiya.Az xəbər verir ki, bu sözləri noyabrın 11-də BMT-nin Ümumdünya Ərzaq Proqramının icraçı direktoru Devid Bisli deyib.
“Bu müqavilə tamamilə zəruridir. Bu məsələdə bütün ölkələr əməkdaşlıq etməli və rol oynamalıdır. Rusiyanı sevib-sevməməyinin fərqi yoxdur, dünyanın rus taxılına və gübrələrinə ehtiyacı var”, - deyə icraçı direktor  RİA Novosti-yə bildirib.

O, həmçinin, təşkilatın bu müqavilənin uzadılmasını təmin etmək üçün bütün tədbirləri görəcəyini qeyd edib.

Kremlin sözçüsü Dmitri Peskov da BMT-dən taxıl sazişi ilə bağlı qarşılıqlı anlaşma olduğundan danışıb. Lakin vaxtın uzadılmasına dair mümkün qərarları açıqlamayıb.

Noyabrın 7-də Rusiya Federasiyasının BMT-dəki nümayəndəsinin birinci müavini Dmitri Polyanski “İzvestiya” qəzetinə verdiyi müsahibədə söyləyib: “BMT Rusiyaya vəd edib ki, taxıl sazişinə uyğun olaraq tezliklə Rusiya ərzaq məhsullarının ixracına qoyulan məhdudiyyətlərin aradan qaldırılmasına nail ola biləcək”.

Zərintac MAYİSQIZI
Missiya.Az