Kreml Qərbin sazişin şərtlərinə əməl etməməsindən sonra Türkiyənin Qara dəniz taxıl təşəbbüsünü bərpa etmək təklifini şərh edib.

Missiya.Az xəbər verir ki, bu barədə oktyabrın 25-də Rusiya prezidenti Vladimir Putinin mətbuat katibi Dmitri Peskov danışıb.

“Putin, əslində, razılaşmanın tərəflərin hər biri üçün şərtlərin yerinə yetirilməsini nəzərdə tutduğunu söylədi. Əvvəlki təcrübə o qədər də uğurlu olmadı və bizim üçün edilməli olanlar edilmədi”, - mətbuat katibi bildirib.

Peskov qeyd edib ki, Türkiyə tərəfi sazişin gələcəkdə mümkün müzakirəsi və ya təkrarlanması üçün sənəd layihəsini təhvil verib: “Hazırda bu sənəd bizim müvafiq idarə və mütəxəssislərimiz tərəfindən araşdırılır. Həmin məsələ ilə bağlı mövqelər prezidentə bildiriləcək”.

Həmçinin Türkiyə prezidenti Rəcəb Tayyib Ərdoğanın Rusiya liderinin Ukraynada daimi atəşkəsə nail olmaq üçün şərait axtarması ilə bağlı sözlərinə münasibət bildirən Peskov deyib ki, bunu Türkiyə dövlət başçısının özü ilə aydınlaşdırmaq lazımdır.

"Putin qarşıya qoyulan vəzifələri yerinə yetirmək və məqsədə çatmaq üçün xüsusi hərbi əməliyyatın davam etdirilməsi ilə məşğuldur" deyən mətbuat katibi Rusiya Federasiyasının öz məqsədlərinə danışıqlar yolu ilə nail olmaq üçün açıq qaldığını vurğulayıb.

Zərintac Mayisqızı
Missiya.Az