Türk Ağsaqqalları İctimai Birliyi - TAİB-in İdarə Heyətinin üzvləri Azərbaycan Kinomatoqrafçıları İttifaqının sədri, Xalq artisti Rasim Balayevin dəvəti ilə qurumun ofisində qonaq olublar.

Missiya.Az xəbər verir ki, TAİB nümayəndələrini səmimiyyətlə qarşılayan R. Balayev təşkilatın həyata keçirdiyi layihələri yüksək qiymətləndirdiyini bildirib.

Öz növbəsində TAİB sədri S. İmamverdiyev xoş münasibətə görə Xalq artistinə təşəkkürünü bildirib. Kinomatoqrafçılar İttifaqının aparat işçilərinin də iştirak etdiyi görüşdə Azərbaycan kino sənayesinin bugünkü vəziyyəti, ciddi ekran əsərlərinin yaradılmasına əngəl olan səbəblər və aktyor bazasının səviyyəsi barədə müzakirə aparılıb, qonaqlara mövcud reallıqlar barədə ətraflı məlumat verilib.

Rasim Balayev qeyd edib ki, Prezident İlham Əliyev milli kinonun inkişafına xüsusi maraq göstərir və bu sahəyə dəstəyini əsirgəmir. Görüşdə Xalq artisti Şəfiqə Məmmədova, TAİB tərəfindən isə Qadınlar Şurasının üzvü, Nizami rayonu Mədəniyyət Mərkəzinin direktoru Laura Quliyeva da iştirak edib.

Zərintac Mayisqızı
Missiya.Az