“Son 30 il ərzində biz regionda “qanunsuzluq” şəraitində yaşamışıq və buna son qoymağın, təkcə ölkəmizdə deyil, bütün regionda qanunun aliliyini bərqərar etməyin vaxtı çatıb”.

Missiya.Az erməni mediasına istinadən xəbər verir ki, bunu Ermənistanın baş naziri Nikol Paşinyan bir gün əvvəl Tavuş vilayətinin sərhəd yaşayış məntəqələrinin sakinləri ilə görüşündə səsləndirib.

“Hesab edirik ki, “vay, Azərbaycan 50 metr uzaqdadır” yox, “ay  Azərbaycan 50 metr aralıdadır, biz orada ticarət edəcəyik, orada iqtisadiyyat quracağıq” demək lazımdır. İndi mənə deyə bilərsiniz ki, “bunun baş verəcəyinə 100 faiz zəmanət verilirmi?” Deyəcəm ki, “100 faiz zəmanət vermirəm, amma bilirəm ki, addım-addım atmaqla biz 90 faiz və ya daha çox nəticə əldə edəcəyik”, Paşinyan deyib.

Baş nazir onu da əmin etdi ki, bu addımlar atılmasa, yəni kəndlər Azərbaycana qaytarılmasa növbəti müharibə olacaq.

“Haqq var, qanun var, xətt var, gedib bu xətdə dayanacağıq. Bu xətt üzərində dayansaq, bugünkündən 100 dəfə güclü olacağıq. Söhbət qarşılıqlı güzəştlərdən getmir, söhbət Ermənistan Respublikasını bir dövlət kimi gücləndirməkdən gedir”, - Paşinyan bildirib.

Elcan
Missiya.Az