Türk Dünyası Araşdırmaları Beynəlxalq Elmlər Akademiyasının Azərbaycan üzrə təmsilçisi, professor Elçin İsgəndərzadənin verdiyi məlumata görə, bu günlərdə həmin Akademiyanın Elmi Şurasının qərarı ilə Azərbaycan Dövlət Pedaqoji Universitetinin professoru, filologiya elmləri doktoru Leyla Orxan qızı Vəzirova Türk Dünyası elminə və təhsilinə göstəridiyi böyük xidmətlərə görə Akademiyanın həqiqi üzvü (akademiki) seçilmiş və Beynəlxalq Qızıl Ulduz medalı ilə təltif olunub.
Filologiya elmləri doktoru, professor Leyla Orxan qızı Vəzirova 1 yanvar 1967-ci ildə Bakı şəhərində ziyalı ailəsində anadan olub. 1974-1984-ci illərdə 189 saylı Bakı məktəbində oxuyub və həmin məktəbi bitirmişdir. 1984-cü ildə Azərbaycan Dövlət Universitetinin (indiki Bakı Dövlət Universiteti) filologiya fakültəsinə daxil olub və oranı “əla” qiymətlərlə bitirmişdir. 1990-cı ildən müəllimlik fəaliyyətini Azərbaycan Pedaqoji İnstitutunda (indiki Azərbaycan Dövlət Pedaqoji Universiteti) bu günə qədər davam etdirir. 2002-ci ildə “Yusif Vəzir Çəmənzəminlinin publistikakası” adlı namizədlik dissertasiyası müdafiə edərək, filologiya üzrə fəlsəfə doktoru elmi dərəcəsinə layiq görülüb. 2013-cü ildə doktorluq dissertasiyası müdafiə edib və filologiya elmləri doktoru elmi dərəcəsi alıb. 2019-cu ildə professor elmi adına layiq görülüb.
Elmlər doktoru elmi dərəcəsi alandan sonra, Azərbaycan Respublikası Prezidenti yanında Ali Attestasiya Komissiyasının humanitar elmlər üzrə Ekspert Şurasının üzvü, müxtəlif elmi şuraların üzvü olub və olmaqdadır. Bir neçə xarici (Türkiyə, Rusiya, Ukrayna Qazaxstan, Belorusiya, Avstraliya, isveçrə və s.), və ölkədaxili elmi seminar, konfrans və simpoziumlarda iştirak edib. Çoxsaylı elmi məqalə, dərslik, dərs vəsaiti, proqram, monoqrafiya müəllifidir.
Bu hadisə həm də onunla əlamətdardır ki, Leyla Vəzirova Şuşa torpağında doğulmuş, görkəmli yazıçı, publisist, elm xadimi, Azərbaycan Xalq Cümhuriyyətinin Osmanlı Türkiyəsində ilk səfiri olmuş Yusif Vəzir Çəmənzəminlinin nəvəsidir.
