![](/uploads/posts/2024-03/romanian.jpg)
Qara dəniz sualtı kabel xətti (Azərbaycan-Avropa İttifaqı yaşıl dəhlizi) Avropaya təmiz enerji təchizatını təmin etmək üçün imkanlar açır.
Missiya.Az Trend-ə istinadən xəbər verir ki, bunu Rumıniyanın energetika naziri Sebastyan-İohan Burduja bu gün Bakıda keçirilən Cənub Qaz Dəhlizi Məşvərət Şurasının nazirlərin 10-cu iclasının və Yaşıl Enerji Məşvərət Şurasının 2-ci nazirlərin iclasının plenar iclasında çıxışı zamanı deyib.
Onun sözlərinə görə, Rumıniyanın nəqliyyat sisteminin operatoru TRANSGAZ tranzit boru kəmərlərində əks axın qabiliyyətini təmin edib ki, Trans-Balkan dəhlizi tam gücü ilə işləsin və lazımi qazı təkcə Rumıniyaya deyil, həm də regionun digər ölkələrinə çatdırsın.
"Qara dəniz sualtı kabel xətti bərpa olunan enerjinin ötürülməsi üçün əhəmiyyətli potensiala malikdir. Bu, Avropaya təmiz enerji təchizatını təmin etmək üçün mühüm imkan yaradır", - o bildirib.
Qeyd edək ki, bu gün Bakıda Cənub Qaz Dəhlizi (CQD) Məşvərət Şurası çərçivəsində nazirlərin 10-cu, Yaşıl Enerji Məşvərət Şurası çərçivəsində isə nazirlərin 2-ci iclası keçirilib. İclasda 23 ölkənin, 6 beynəlxalq təşkilatın və 44 şirkətin nümayəndələri ilə yanaşı, Azərbaycan və Avropa İttifaqı ölkələrindən nazirlər, nazir müavinləri və digər yüksək vəzifəli şəxslər iştirak ediblər.
Xatırladaq ki, 2022-ci il dekabrın 17-də Azərbaycan, Gürcüstan, Rumıniya və Macarıstan Qafqaz regionundan Avropaya enerji körpüsünün tikintisini nəzərdə tutan strateji tərəfdaşlıq sazişi imzalayıblar.
Əldə edilən razılaşma çərçivəsində 1000 MVt gücündə və 1195 kilometr uzunluğunda "Black Sea Energy" dənizaltı elektrik kabelinin çəkilməsi gözlənilir. Kabel Azərbaycanda hasil edilən "yaşıl" elektrik enerjisini Gürcüstan və Qara dəniz vasitəsilə Rumıniyaya çatdırmaq üçün Macarıstana və Avropanın qalan hissəsinə nəql olunacaq. Bu, dörd gigavata qədər "yaşıl" enerjinin verilməsinə imkan verəcək.