![](/uploads/posts/2024-03/img_3657.jpg)
Milli Məclisin sədri Sahibə Qafarova martın 1-də ölkəmizdə səfərdə olan Almaniya Federativ Respublikası Bundestaqının Hüquq siyasəti komitəsinin sədri Elizabet Vinkelmayer-Bekerin rəhbərlik etdiyi nümayəndə heyəti ilə görüşüb.
Bu barədə Missiya.Az-a Milli Məclisin Mətbuat və ictimaiyyətlə əlaqələr şöbəsindən məlumat verilib.
Qonaqları Azərbaycan parlamentində salamlayan spiker ümidvar olduğunu bildirib ki, bu səfər ölkələrimiz və parlamentlərimiz arasında münasibətlərə töhfə verəcək. O, Azərbaycan və Almaniyanın dost və tərəfdaş ölkələr olduğunu, hər iki tərəfin ölkələrimiz arasında qarşılıqlı faydalı əməkdaşlığın inkişafında maraqlı olduğunu qeyd edib.
Görüşdə ikitərəfli münasibətlərin inkişafında yüksək səviyyəli siyasi dialoqun, xüsusilə dövlət başçıları səviyyəsində həyata keçirilən qarşılıqlı səfərlərin və görüşlərin müstəsna rolu vurğulanıb. Milli Məclisin sədri Prezident İlham Əliyevin bu il Münxen Təhlükəsizlik Konfransında iştirakı çərçivəsində də kansler Olaf Şoltsla görüşdüyünü və müzakirələr apardığını xatırladıb.
Görüşdə spiker Sahibə Qafarova hazırda regionda mövcud olan vəziyyət, Azərbaycanla Ermənistan arasında sülh prosesinin perspektivləri, münasibətlərin normallaşdırılması, etimad mühitinin yaradılması və sülhün təsis edilməsi üçün vacib əhəmiyyət kəsb edən məqamlar barədə qarşı tərəfə ətraflı məlumat verib.
Milli Məclisin sədri Münxendə Azərbaycan Prezidenti və Ermənistan baş nazirinin kansler Olaf Şoltsun vasitəçiliyi ilə bir araya gəldiyini, son 2 gündə isə Almaniya paytaxtında Azərbaycan və Ermənistan xarici işlər nazirlərinin də sülh sazişi üzrə danışıqlar apardığını xatırladaraq, bu məsələdə Almaniyanın neytral mövqeyini müsbət qiymətləndirib.
Milli Məclisin sədri qarşı tərəfin diqqətinə çatdırıb ki, Ermənistan yalan və həqiqətdən uzaq iddialarla çıxış edir və beynəlxalq ictimaiyyəti yalnış məlumatlandırmağa çalışır.
Sahibə Qafarova görüşdə qeyd edib ki, bu gün Qərbdəki bəzi dairələr Azərbaycanın guya Ermənistana hücum edəcəyi haqda absurd, yalan iddialar ortaya atır. O, bir daha vurğulayıb ki, bu iddiaların heç bir əsası yoxdur. Azərbaycan bu gün işğaldan azad olunmuş ərazilərdə genişmiqyaslı bərpa və quruculuq işləri aparır və yeni şəhərlər, kəndlər salınır. Böyük qayıdış proqramı çərçivəsində keçmiş məcburi köçkünlər öz torpaqlarına qayıdırlar. Belə olduğu halda, Azərbaycanın Ermənistana hücum edəcəyi ilə bağlı iddialar tamamilə qəbuledilməzdir.
Milli Məclisin sədri, həmçinin bu gün Avropada bəzi dairələr tərəfindən Azərbaycana qarşı ikili standartları kəskin tənqid edib. O, diqqətə çatdırıb ki, Azərbaycan torpaqları 30 il ərzində Ermənistan tərəfindən işğal altında saxlanılıb. İşğal dövründə 9 şəhər və yüzlərlə kənd, tarixi, mədəni, dini abidələrimiz tamamilə dağıdılıb, 1 milyon vətəndaşımız qaçqın və məcburi köçkün düşüb. Azərbaycan 30 il ərzində ədalətin, beynəlxalq hüququn bərpa olunmasını gözləyib. Buna baxmayaraq, beynəlxalq ictimaiyyət Ermənistana qarşı heç bir sanksiya tətbiq etməyib. Azərbaycan özü ərazilərini işğaldan azad edib, beynəlxalq hüququn norma və prinsiplərinin icrasını təmin edib. 30 illik işğala baxmayaraq, məhz Azərbaycan regionda uzunmüddətli sülhün əldə olunması təşəbbüsü ilə çıxış edib, beynəlxalq hüququn 5 əsas prinsipi, o cümlədən bir-birinin suverenliyinin və ərazi bütövlüyünün qarşılıqlı tanınması əsasında sülh sazişi mətnini hazırlayaraq, Ermənistana təklif edib.
Spikerin sözlərinə görə, Azərbaycan dəfələrlə bildirib ki, sülh sazişinin imzalanmasına heç bir maneə yoxdur və biz müsbət nəticə əldə etmək üçün səylərimizi davam etdiririk.
Milli Məclisin sədri bununla yanaşı, 250 min azərbaycanlının Ermənistandan deportasiya olunduğunu və qaçqın həyatı yaşamağa məcbur olduğunu bildirib. Sahibə Qafarova deyib ki, bu gün də 250 min azərbaycanlının hüquqları haqqında heç kəs danışmır və bu da ikili standartların nümunəsidir.
Bundestaqın Hüquq siyasəti komitəsinin sədri Elizabet Vinkelmayer-Beker görüş və müzakirələr aparılması üçün imkan yaradılmasına görə minnətdarlığını bildirərək, regiona səfərlərinin məqsədləri barədə məlumat verib.
O, sülh sazişinin imzalanması, etimad mühitinin yaradılması üzrə danışıqları dəstəklədiklərini bildirərək, deyib ki, Almaniya ərazi bütövlüyü və sülh məsələsində Azərbaycanla birlikdədir. Komitə sədri vurğulayıb ki, Qarabağ beynəlxalq hüquq baxımından hər zaman Azərbaycanın ərazisi olub. Elizabet Vinkelmayer-Beker ümidvar olduğunu bildirib ki, aparılan danışıqlar müsbət nəticə verəcək və tərəflər arasında sülh sazişinin imzalanması mümkün olacaq.
Görüşdə ikitərəfli əməkdaşlıq, parlamentlərimiz arasında münasibətlər, həmçinin qarşılıqlı maraq doğuran digər məsələlər ətrafında da fikir mübadiləsi aparılıb.