"Azərbaycan Uşaqları" İctimai Birliyinin Uşaq Sığınacağı Reinteqrasiya Mərkəzinə bir ailədən 4 nəfər azyaşlı uşaq baxımsız, təhsildən yayınan, sosial təhlükəli vəziyyətdə qəbul edilib.

Missiya.Az xəbər verir ki, bu barədə "Azərbaycan Uşaqları" İctimai Birliyinin mətbuat xidmətindən bildirilib. 

Məlumata görə, uşaqların anası ağır mədə xərçəngindən əziyyət çəkir. Ailəyə ilkin səfər zamanı ana və uşaqların heç birinin qeydiyyatının olmaması, azyaşlıların təhsildən yayınması və ananın ağır vəziyyətdə evdə müalicəsiz baxımsız şəraitdə qalması aşkarlanıb. 

İctimai Birliyin müraciəti əsasında Azərbaycan Respublikası Səhiyyə Nazirliyi, Tibbi Ərazi Bölmələrinin İdarəetmə Birliyinin, İcbari Tibbi Sığorta üzrə Dövlət Agentliyinin göstərişi və dəstəyi ilə ana ağır vəziyyətdə ilkin olaraq M.A.Qasımov adına Respublikası Klinik Xəstəxanasına yerləşdirilib. 

Qeyd edilib ki, azyaşlıların reabilitasiyası AUİB-nin Uşaq Sığınacağı-Reinteqrasiya Mərkəzində həyata keçiriləcək.

Missiya.Az