Vyetnamlı həkimlər şiddətli baş ağrılarından və görmə qabiliyyətinin itirilməsindən şikayətlənən 35 yaşlı kişinin kəlləsində yemək çubuqları aşkar ediblər. 

Missiya.Az xəbər verir ki, hadisə barədə "Daily Mail" məlumat yayıb .

Nəşr qeyd edir ki, yerli sakin Vyetnamın Donq Hoy şəhərindəki xəstəxanaya beş ay ərzində səbəbsiz baş ağrılarından və görmə qabiliyyətinin itirilməsindən əziyyət çəkdikdən sonra gəlib. Həkimlər simptomların səbəbini anlamaq üçün rentgen çəkiblər və kişinin kəlləsində burun boşluğundan daxil olan yemək çubuqlarını olduğunu görüblər.

Kişi əvvəlcə həkimlərə çubuqların başına necə girdiyini izah edə bilməyib, lakin sonradan yadına düşüb ki, 5 ay əvvəl dava edib və bu zaman onun üzünə iti əşya ilə zərbə endirilib. Onun sözlərinə görə, həmin gün həkimlərə getsə də, evə qaytarılıb.

Məlumata görə, həkimlər xəstənin kəllə sümüyünün çubuqlarını çıxarıb və onun vəziyyətini stabilləşdirə biliblər.

Leyla SƏMƏNDƏR

Missiya.Az